Discuss
3月無目的兩公婆東京之旅
3月頭見有平機票同大假,咪同老婆飛去東京6日hea下, 因為諗住食壽司大所以頭3晚住築地嗰頭,之後入河口湖住兩晚,無目的無plan景點,行到邊食到邊 一落機就攞房而後到築地的晚飯, 我哋去左虎杖食,老婆叫左個5色本地海胆飯,我就海鮮飯三食,兩個飯都唔錯,夠鮮味,我老婆仲話D海胆好甜唔腥添 食完就返酒店休息, 校定鐘起身食壽司大, 今次我老婆話一定要試壽司大, 所以專登訂左間近築地市場的庵酒店, 雖然新但房細, 喼唔可以完全打開, 不過乾淨企理啦 我哋3點3左右到壽司大, 但已經有人坐係門口等啦, 我哋就排二同三, 3點9左右就坐滿第一輪的人數, 好彩當日無落雨又唔算太凍又有位坐, 所以玩陣手機到差唔多5點就入得去食 我哋揀4000yen個set, 10+1件自選, 件件都好鮮味, 特別係件拖羅同赤貝, 真係好正, 件赤貝上枱時仲有少少反應, 老實, 你問我值唔值得晨咁早去排差唔多兩個鐘去食, 若果你真係好鍾意食壽司好似我老婆咁, 係值嘅, 若果唔係, 其實隔離大和壽司都唔錯, 事關我哋之前都有食過, 而且排隊無壽司大咁誇張, 不過個飯底壽司大係好食少少嘅 我哋食完先係5點9左右, 個天先開始光, 不過條隊已經有成廿幾人了, 之後我哋返酒店訓多陣先再出去 訓醒時都成11點左右, 之後落新宿行街食嘢, 先去左間叫果實園食中午, 揀嗰度係常試佢嘅鮮果蛋糕 由於士多啤梨當造, 所以我哋都揀左士多啤梨蛋糕, 成件蛋糕好多士多啤梨, 又大粒又甜, 唔錯 話到明無目的hea行, 所以喺新宿行下睇下又到晚飯時間, 今次去左間叫神田之肉Rump Cap的餐廳食牛, 下面嗰份係燒牛心, 好食好爽口, 而再下面係佢哋所講牛最稀有的部位Rump Cap, 肉唔韌, 肉汁多, 但我覺得牛味少左D 食完牛之後就揾甜品食, 我哋去左間食pancake嘅, 不過好麻麻, 食完就返酒店休息了 第三日落原宿行街, 而中午先去食個壽喜燒先, 我哋上網揾過呢間喺人形町叫今半的壽喜燒唔錯, 所以一早訂定位食中午, 一個set有三件, 好食, 入口即溶, 之後仲每人追加兩件添, 而最後打埋隻蛋落個汁度炒一陣放落碗白飯度食, 真係汁都撈埋 之後落原宿行街睇嘢, 我老婆就收獲大囉, 而我就做左流動提款機囉, 行到攰, 上左去食Bills, 好彩唔駛點排隊, 事關前排D人唔願意坐露台, 所以等左一陣就入得去食, 我哋點左個招牌pancake試, 講真, 我哋覺得麻麻, 個pancake蛋味唔多夠, 我哋都係鍾意大阪嗰間Gram多D 其實食完個tea都差唔多5點幾, 所以之後行多陣去阿夫利食埋個拉面就返酒店
See this content immediately after install